සෙනෙගාල ජනාධිපති MACKY SALL විසින් එරට පාර්ලිමේන්තුවට 2024 පෙබරවාරි 25 වැනිදාට සැලසුම් කර තිබූ ජනාධිපතිවරණය කල් දැමීමේ අරමුණින් ගෙන ආ පනත විපක්‍ෂයේ මන්ත්‍රී වරුන් කීපදෙනෙක් ද මුදලට ගනිමින් සම්මත කර ගැනීමත් සමග රට පුරා අරාජික තත්වයක් ඇති වී ඇතැයි වාර්තා වේ. පෙබරවාරි 9 සිකුරාදා එරට අගනුවර ඩකා වෙතට ප්‍රජාතන්ත්‍රවාදය රැක ගැනීම සඳහා වූ ඉල්ලීමට සියලුම වයස්වල සෙනගාල ජාතිකයන් දහස් ගණනක් ප්‍රතිචාර දැක්වූහ. මේ වන විට මෙම වසරේ දෙසැම්බර් 15 වැනිදා දක්වා ජනාධිපතිවරණය කල් යැවූ තීරණයට එරෙහිව යුරෝපා සංගමය, ඇමරිකාව හා ප්‍රංශය හා අප්‍රිකානු කලාපීය සංගමය(CEDEO) මෙන්ම එක්සත් ජාතීන්ගේ සංවිධානය ද ප්‍රතිචාර දක්වා ඇත.
2012 සිට තම විරුද්ධ පාක්ෂිකයින් මර්දනය කරමින් බලයේ සිටින සෙනගාල ජනාධිපති MACKY SALL තුන්වෙනි වරටත් ජනාධිපතිවරණයට ඉදිරිපත් වීමට ව්‍යවස්ථාව සංශෝධනය කිරීමට ගනු ලැබූ උත්සාහයත් සමග ඇවිලී ගිය ආණ්ඩු විරෝධය මේ වන විට දැවැන්ත දේශපාලන අර්බුධයක් දක්වා වර්ධනය වෙමින් පවතී. තම ප්‍රධාන විරුද්ධ වාදියා වන ඔස්මාන් සොන්කෝ තරුණ නායකයා ස්ත්‍රී දුෂණ චෝදනා ඉදිරිපත් කරමින් සිර ගෙට දක්කා චන්ද සටනෙන් ඉවත් කල MACKY SALL මෙවර ව්‍යවස්ථානුකුලව පැවැත්වීමට නියමිත චන්දය කල් දැමුවේ පාර්ලිමේන්තුවට ඒ සම්බන්ධයෙන් වූ පනතක් ගෙනෙමින් සම්මත කර ගනිමිනි. මේ සමගම රටම ආණ්ඩු විරෝධයෙන් ගිනි ගෙන ඇති අතර මේ වන විට පොලිස් වෙඩි පහරින් ශිෂ්‍යයින් දෙදෙනෙකු මිය ගොස් ඇත.
ඡන්දය කල්දැමීමට එරෙහිව හා සැලසුම් කළ පරිදි ජනාධිපතිවරණය පවත්වන ලෙස ඉල්ලා විපක්‍ෂයේ ඒකාබද්ධ පෙරමුණක් පිහිටුවීමට තීරණය කිරීමත් සමඟ ජනතාව සහ පොලිසිය අතර සමස්ථ රට පුරා මුහුණට මුහුණ ගැටුම් ආරම්භ වී ඇති අතර විපක්‍ෂයේ රැස්වීම් MACKY SALL රජය විසින් ප්‍රචණ්ඩ ලෙස මර්දනය කරමින් සිටින බව වාර්තා වේ. එසේම “මැකී සාල්, ඒකාධිපතියා, මැකී සල්, මිනීමරුවා,” රට පුරා පෝස්ටර් ඇලවෙමින් හා බිත්ති පුරා ලියවෙමින් තිබේ.
ජනාධිපතිවරණය කල්දැමීම හෙළා දැකීමට සහ මැතිවරණ දිනය යලි ප්‍රකාශයට පත් කරන ලෙස ඉල්ලා සිවිල් හා ආගමික සංවිධාන සහ වෘත්තීය සමිති වලින් ව්‍යාපාර තිහකට අධික සංඛ්‍යාවක් ඒකාබද්ධ කරමින් “ප්‍රජාතන්ත්‍රවාදය ආරක්ෂා කරමු”, යයි සංවිධානයක් බිහිකර ඇත. මෙම පෙරමුණට ප්‍රාථමික හා ද්විතීයික පාසල්වල සිසුන් හා ගුරුවරුන් එක් වී ඇත. තවද රටේ විදුලි සංදේශ, ප්‍රවාහන, සෞඛ්‍ය යනාදී වෙනත් අංශවලින් වෘත්තීය සමිති බලමුලු ගැන්වීම සඳහා පෙබරවාරි 12 වැනි සඳුදා විශාල රැස්වීමක් රටේ අගනුවරදී සංවිධානය කිරීමට සැලසුම් කර ඇත. පෙබරවාරි 13 අඟහරුවාදා සවස 3 සිට 7 දක්වා අගනුවර සාමකාමී පාගමනක් පැවැත්වීමටද සැලසුම් කර ඇත.
මෙම දේශපාලන අර්බුදයේ ප්‍රධාන ගොදුර බවට රටේ තරුණයන් පත් වී ඇති අතර මේ වන විට සිය ගනනක් තරුණයන් තම ජීවිත වලින් වන්දි ගෙවා සැලකිය යුතු තරුණ පිරිසක් තවමත් අත්අඩංගුවේ ද පසුවේ. පාසල් සහ විශ්ව විද්‍යාල වසා දැමීම නිසාද ඔවුන් තව තවත් අර්බුධයට පත් වී ඇත. සෙනගාල ජාතිකයින් දෙදෙනෙකුගෙන් එක් අයෙකු වයස අවුරුදු 18 ට අඩු වන අතර ඔවුන් ජනගහනයෙන් 55%ක් නියෝජනය කරනු ලබයි.
“දීර්ඝ කාලයක් පුරා සෙනෙගාල තරුණ තරුණියන්ගෙන් එරට පාලකයෝ ඉල්ලා සිටියේ සන්සුන්ව සිටින ලෙසත්, ඡන්දයෙන් ක්‍රමය වෙනස් කිරීමට මැතිවරණ එනතෙක් බලා සිටින ලෙසත් ය. නමුත් මැතිවරණ කල් දැමීමත් සමඟ රටේ තරුණ පරපුර අපේක්‍ෂා භංගත්වයට පත් වීම නිසා රට පුරා විරෝධතා වල ඔවුන් පෙරමුණු ගනිමින් සිටිනවා” යයි එරට විශ්ව විද්‍යාල ආචාර්ය වරුන්ගේ සංගමය නිකුත් කල නිවේදනයක සඳහන් වේ.
මේ අතර සෙනෙගාල ජනාධිපති MACKY SALLගේ මෙම “ව්‍යවස්ථා කුමන්ත්‍රණයට එරෙහිව ජාත්‍යන්තර ප්‍රජාව තම විරෝධය පල කර ඇත. මැතිවරණ කල් දැමීම පිටුපස මේ වන විට තම පැරණි යටත් විජිත වන මාලි, නයිජර් හා බුර්කිනා අහිමි වී චීනය හා රුසියාව සමග අර්බුධයක පැටලී සිටින ප්‍රංශය සිටින බවට පැතිරෙන වාර්තා නිසා ප්‍රංශ ජනාධිපති වරයා නිවේදනයක් නිකුත් කරමින් වහා මැතිවරණය පවත්වන ලෙස ඉල්ලා ඇත. ඒ හා සමානව ඇමරිකාව, යුරෝපා සංගමය හා එක්සත් ජාතීන්ගේ සංවිධානය ද මර්දනය අවසන් කර මැතිවරණ සඳහා සමීප දිනයක් යෝජනා කරන ලෙස MACKY SALL පාලනයට මේ අතර බල කර සිටි.
