මේ වන විට රුසියානු-යුක්රේන යුද්ධය හේතුවෙන් ශ්‍රී ලංකාවට සංක්‍රමණය වී සිටින දහස් ගණන් රුසියානු සහ යුක්රේන ජාතිකයන් සඳහා දීර්ඝ කාලීන සංචාරක වීසා බලපත්‍ර ලබාදීම අවසන් කරන බව ශ්‍රී ලංකාව පෙබරවාරි 25 ඉරිදා නිවේදනය කරනු ලැබ ඇත. 2022 පෙබරවාරි මාසයේදී මොස්කව් පාලනය විසින් යුක්රේනය ආක්‍රමණය කළ දා සිට මෙම රටවල් දෙකේ පුරවැසියන් දිවයිනේ ජීවත් වීම සඳහා යොදා ගනු ලැබ ඇති බව ශ්‍රී ලංකා ආගමන විගමන ආරංචි මාර්ග සඳහන් කරයි.
“රජය තවදුරටත් වීසා දීර්ඝ කිරීම් මෙම රටවල් දෙකෙහි ජනතාව සඳහා ලබා දෙන්නේ නැත,” යයි ශ්‍රී ලංකා ආගමන කොමසාරිස් ජනරාල් හර්ෂ ඉලුක්පිටිය ප්‍රංශ පුවත් සේවය වෙත පැවසුවේ ඔවුන් දිවයිනෙන් පිටත්වීමේ අවසාන දිනය මාර්තු 7 ලෙසට නියම කරමිනි. “මේ රටවල් දෙක අතර ගුවන් ගමන් දැන් සාමාන්‍ය තත්ත්වයට පත් වී ඇති අතර ඔවුන්ට ආපසු නිවෙස් කරා යාමට අපහසු නැත,” ඔහු වැඩිදුරටත් මාධ්‍ය වෙත පවසා සිටියේය.
නිල සංඛ්‍යාලේඛනවලට අනුව පසුගිය වසර දෙක තුළ රුසියානුවන් 288,000 කට වැඩි පිරිසක් සහ යුක්රේන ජාතිකයන් 20,000 කට ආසන්න පිරිසක් ශ්‍රී ලංකාවට පැමිණ තිබේ. සාමාන්‍ය දින තිහක සංචාරක වීසා බලපත්‍රයට වඩා වැඩි කාලයක් රට තුල රැඳී සිටින ප්‍රමාණය මේ දක්වා සංඛ්‍යාලේඛන ගත කර නොමැත. එහෙත් රුසියානුවන් දහස් ගණනක් සහ යුක්රේන ජාතිකයන් කුඩා සංඛ්‍යාවක් ශ්‍රී ලංකාවේ පදිංචි වී ඇති බව විශ්වාස පල කෙරෙන අතර ඇතැමුන් රටවල් දෙකෙහි යුද්ධය සඳහා හමුදාවට බඳවා ගැනීම් වලින් මිදීම සඳහා මෙසේ රට තුල ජීවත්වීමට තීරණය කර ඇති අතර එයින් සමහරු අවන්හල් හෝ රාත්‍රී සමාජශාලා ද විවෘත කර ඇත.
රටෙහි දකුණු දිග කලාපයේ සංචාරක නිකේතන නගරයක් වන උණවටුනෙහි “සුදු ජාතිකයින්ට පමණක්” යයි සඳහන් කරමින් සාදයක් පැවැත්වූ රුසියානු ජාතිකයින් විසින් පවත්වාගෙන යනු ලබන රාත්‍රී සමාජ ශාලාවකට එරෙහිව ශ්‍රී ලංකාවේ සමාජ මාධ්‍ය හරහා තරුණයන් විසින් එල්ල කල දැවැන්ත විරෝධතා ව්‍යාපාරයකින් පසුව රජය මෙම තීරණය ගෙන ඇත. එසේම ඇතැම් අවස්ථාවලදී යුක්රේන හා රුසියානුවන් වෙරළ බඩ කලාපය තුල ගැටුම් ඇති කර ගැනීම ද මෙම තීරණය ගැනීමට හේතු වී ඇත.
2022 හි ඇති වූ ආර්ථික අර්බුධයෙන් පසුව රට තුල මතු වූ දැවැන්ත විදේශ මුදල් හිඟය හේතුවෙන් දින තිහක හා ඊට ඉක්මවා ගිය වීසා බලපත්‍ර ලබා දීමෙන් සංචාරක ව්‍යාපාරය නංවාලීමට ශ්‍රී ලංකාව උත්සාහ කළේය. 2022 අප්‍රේල් මාසයේ සිට ශ්‍රී ලංකාව ඩොලර් බිලියන 46 ක විදේශ ණය ගෙවීම පැහැර හැර ඇති තත්වය තුල අර්බුධය සමනය කර ගැනීමට සංචාරක කර්මාන්තය ඉවහල් විණි.
මාස ගණනාවක් පුරා පැවති ජනතා විරෝධතා හේතුවෙන් එවකට රට පාලනය කල ජනාධිපති ගෝඨාභය රාජපක්ෂට ඉල්ලා අස්වී රටින් පලායාමට පවා සිදු විය. ඉන් පසුව ඩොලර් බිලියන 2.9 ක මුදලක් අන්තර් ජාතික ජාත්‍යන්තර මූල්‍ය අරමුදල විසින් රටේ ආර්ථිකය ස්ථාවර කිරීමට සහ ආහාර, ඉන්ධන සහ ඖෂධ වැනි අත්‍යවශ්‍ය හිඟය අවසන් කිරීම සඳහා ලබා දීමෙන් එරට ඩොලර් හිඟය තාවකාලිකව අවසන් වී තිබේ. එහෙත් පසුගිය වසරේ අප්‍රියෙල් මාසයේ සිට ශ්‍රී ලංකාව තම ණය වාරිකය ගෙවීම නතර කර ඇති තත්වයක් තුල රටේ යම් ස්ථාවර භාවයක් කෙටි කාලීනව දක්නට ලැබුනද එම ණය වාරිකයන් ගෙවීමට පටන් ගත් විට යලිත් අර්බුධ කාරී තත්වයක් ඇති විය හැකි බව ආර්ථික විශේඥයන්ගේ අදහසයි.
